Legs de 1263 et 1269

Legs de 1263

    A touz caux qui ces presentes lettres verront et orront, Guillaumes par la grace de Deu abbes de Bourguel et tous li convens de cest meismes lieu, salut perdurable en N(ost)re Sign(o)ur. Saichent tuit que comme nous heussions une maison de nostre ordre de Biaumont en la veschiei de Toul pres de Brixei-lou-Chastel, laquelle maison nous estoit plus coustangeuze qu'elle ne aportoit de proffit et a trois lieues ou pou moins pres de celle maison heust un hospitaul fondei novellement en l'onour de Nostre-Dame, li quelz hospitaulz est appelles Girbonvaulz, pour haubergier communnement les povres de Nostre Signour et lou servise Nostre Signour faire, louquel hospitaul messires Joffrois Graviers de Boullanrmont et madame Sebile sa femme avoient estaubli pour lour amez et pour les ames lour ancessours, nous resgardons l'onour de Deu et le commun proffit des trespassez et la bonne voluntei dou di Joffroi Graviers et de madame Sebille sa femme et ceu que la dicte maisons nous estoit plus coutangeuze qu'elle ne nous valoit, donnons et otroions quanque nous avons en celle dicte maison et ens appertenancez ou dit hospitaul et volons que li maistres et li frere dou dit hospitaul joissent de la dicte maison et des appertenances comme de la lour desorenavent, et volons que li avesques de Toul de cui dyoscese la dicte maisons est assise joingne lou devant dit leu de Bermont au dit hospitaul et que uns des freres doudit hospitaul soit mis en ladite maison de Bermont par la voluntei de celui qui maistres serat et des frerez dou dit hospitaul en leu dou moinne qui y soloit estre de part nous, et pour ceu que li dis Joffrois dis Graviers et dame Sebile sa femme, avoit veue la bonne voluntei que nous avons heue a l'hospitaul davant dit et lou don que nous li avons fait, il nous ont donnei sexante et deix livres de petis tournoix pour achiter terre a metre au proffit de nostre maison de Bourguel en recompensacion dou davant dit don que nous avons fait au dit hospitaul, de laquelle somme d'argent nous nous tenons pour bien paiei et confessons celle dicte somme d'argent, convertie en l'utilitei de nostre esglise, et renonsons a tous privileges et a toutes exeptions de droit et a toutes constitutions qui nous puelent et pourroient valoir de droit, et pour ceu que se soit ferme chose et estauble, nous et li convens y metons nos saielz. Ce fut fait en l'an de grace mil doulz cens sexante et trois, lou lundi devant la feste de saint Andreu.

Legs de 1269

    Je Jehans, sirez de Joinville et senechaulz de Champaigne et je, Pierres sirez de la Fausche, et nous, je Hans, abbes de Mironault et nous, frere Gauis priouz des freres preschours de Toul, faisons savoir a tous que en nostre presence estaublis Perrins et Joffrois, fil sai en arriere a noble baron Joffroi dit Gravier signour de Boullanrmont ont recognui que lour peres en son bon sen et en sa bonne memoire donna pour Deu et en aumosne a l'ospitaul de Notre-Dame de Girbonval toutes les rentes qu'il tenoit a Martigniei en tous uz et tous prous, fors les corps des hommes et fors les fiez qu'il avoit en la ville, et lour at donnei encor la maison de Bermont et la chieulerie et les doulz estans et toutes les appendises et cinc muis de vin au pressour de Houcelainmont et c'il deffaloit com l'on preist ens rentes de la ville, et la vigne de Taperei et lou jardin qui fut aus homs monsire Ymer et tout ceu qu'il avoit de jardins en la ville et la moitie des vins a (cherures) qu'il achitet au fil monsignour Billei de Vaulcouleur, et quarante rezaulz de bleis parei aus rentes de Sauxures chaucun an. Et donnet seix livres chaucun an pour achiter cottes et solers liquel doient estre achitei et departies a Girbonval ainsi com li testamens l'on devise et sunt a panre les dicts seix livres sur les fours de Sauxures et sur les autres rentes de la ville, et ceste aumosne dessus dicte ont il loee cognue et conformee a garder par lour foi donnee corporelement. Et nous a la requeste des dis freres et de lour mere qui les at loees et saillees de son saeil avons saelles ces lettres de nos saelz que furent faites en l'an de grace mil doulz cens sexante et nuf, ou moi de mars.